बहुउदेश्यीय सभाहल र प्रदर्शनीस्थल निर्माण हुने, जग्गाको सम्झौता खारेज: मन्त्री राई

सभाहल लागि बेवास्ता: सामाजिक सञ्जालमा तिव्र आलोचना

बाँके । शहरी विकास मन्त्री मो. इस्तियाक राईले नेपालगञ्ज उद्योग बाणिज्य संघ सँगको सम्झौता खारेज भएपनि नेपालगञ्जमा बहुउद्देश्यीय सभाहल र प्रदर्शनी स्थल निर्माण हुने बताएका छन ।

संघले सभाहल निर्माणका लागि भोगाधिकारका प्राप्त गरेको सडक डिभिजन कार्यालयको १० विघा जग्गाको सम्झौता मन्त्री परिषदले खारेज गरेको हो ।

मन्त्री राईले सभाहल र प्रदर्शनी स्थलका लागि एक अर्ब बजेट विनियोजन भएको जानकारी दिदै कम्तीमा पाँच विघा जग्गा आवश्यक पर्ने बताए ।

मन्त्री राईले नेपालगञ्ज उप–महानगरपालिकाका मेयर डा. धवल शम्शेर राणालाई जग्गा खोज्न आग्रह गरेको जानकारी दिए ।

मन्त्री राईले नेपालगञ्जमा जग्गा नभेटिए डुडुवा वा जानकी गाउँपालिकाको नेपालगञ्जसँग जोडिएको क्षेत्रमा समेत सभाहल निर्माण गर्न सकिने बताए ।

मन्त्री राईको एकल पहलमा सभाहल र प्रदर्शनीस्थलकालागि एक अर्ब बजेट विनियोजन भएको जनाए ।

भोगाधिकारका लागि प्राप्त भएको जग्गालाई लिजमा परिणत गर्ने निर्णय २०७१ सालमा निर्णय भएपनि नेपालगञ्ज उद्योग बाणिज्य संघले लिजको प्रक्रियामा नगएको, भाँडा नतिरेको र सडक डिभिजन कार्यालयलाई बनाई दिनुपर्ने ८ वटा भवन समेत नबनाएको पाइए पछि भौतिक पूर्वाधार मन्त्रालयको प्रस्तावमा मन्त्रीपरिषदले सम्झौता खारेज गरेको हो ।

संघले सभाहलका नाममा बर्षेनी महोत्सव आयोजना गरेर अढाई करोड रुपैया बचत गरेको भएपनि तीन लाख २५ हजार रुपिया भाँडा नतिरेको पाइएको छ ।

सभाहल तथा प्रदर्शनीस्थलका लागि संघको नेतृत्वले नै बेवास्ता गरेको भन्दै सामाजिक सञ्जालमा तिव्र आलोचना भइ रहेको छ । पहिले ३० बर्ष र पछि २० बर्ष थप गर्न सकिने गरि संघलाई २०६४ सालमा भोगाधिकारका लागि जग्गा दिइएको बताए ।