श्रीमानद्धारा आफ्नै श्रीमतीमाथि एसिड प्रहारः सहयोगीसहित चार जना पक्राउ

घाइतेको उपचार हुँदैंः घटनाबारे अनुसन्धान जारी

भतरपुर । चितवनको भरतपुरमा एक पुरुषले आफ्नै श्रीमतीलाई एसिड प्रहार गरेका छन्। पोखरा महानगरपालिका–२९ आदर्शनगरका ४७ वर्षीय वीरेन गुरूङले ससुरालीमै आएर श्रीमती डोल्मा रूम्बालाई एसिड प्रहार गरेका हुन्।

एसिड प्रहारबाट घाइते रुम्बाको चितवन मेडिकल कलेजमा उपचार भइरहेको छ। उनको अवस्था सामान्य रहेको प्रहरीले जनाएको छ।

बुधबार अपराह्न भरतपुर–२४ धु्रवबजारस्थित माइतमा बसिरहेको अवस्थामा २० वर्षीय डोल्मालाई पोखरा बस्दै आएका वीरेनले गाडी रिजर्भ गरी चार साथीसहित भरतपुर आएर एसिड प्रहार गरेको चितवन जिल्ला प्रहरी कार्यालयका प्रहरी उपरीक्षक सुशीलसिंह राठौरले जानकारी दिए।

पारिवारिक मनमुटावका कारण घटना भएको प्रारम्भिक अनुसन्धानबाट खुलेको प्रहरी उपरीक्षक राठौरको भनाइ छ। पोखराबाट ग १ य ५४३ नम्बरको गाडी रिजर्भ गरेर साथीसहित वीरेन भरतपुर आएका थिए।

घटनामा संलग्न रहेको आरोपमा पोखरा महानगर–१० का ३९ वर्षीय हेम थापा, हेटौँडा–१० का २४ वर्षीय विवेक गुरूङ र पोखरा–२९ का निरेन गुरूङलाई पनि प्रहरीले नारायणगढस्थित लायन्सचोकबाट नियन्त्रणमा लिएको छ।

घटनामा संलग्न भई भाग्न लागेको अवस्थामा जिल्लाका सबै नाकामा घेराबन्दी गरी उनीहरुलाई नियन्त्रणमा लिन सफल भइएको र घटनाका सम्बन्धमा थप अनुसन्धान भइरहेको प्रहरी उपरीक्षक राठौरले बताए। रासस