१६ करोडको गाडी खरिदबारे संसदमा र्‍याखर्‍याखती

काठमाडौं ।सत्तारुढ दल नेपाली कांग्रेसका सभापति तथा प्रधानमन्त्री शेरबहादुर देउवाले राष्ट्रपतिका लागि १६ करोडको गाडी खरिद गर्ने प्रस्ताव नआएको बताएका छन ।

व्यवस्थापिका(संसद्मा विनियोजन विधेयकका मन्त्रालयगत खर्च शीर्षकमा भएको छलफलका क्रममा यस विषयमा जवाफ माग भएपछि प्रधानमन्त्री देउवाले यसरी स्पष्ट पारेका हुन।

नेपाल मजदुर किसान पार्टीका सांसद प्रेम सुवालले प्रधानमन्त्रीसँग जवाफ माग गरेका थिए । राष्ट्रपतिका लागि १६ करोडको गाडी खरिद गरिँदै छ भन्ने कुरा के हो ।

सांसद सुवालले भने–‘राष्ट्रपतिलाई १६ करोड, प्रधानमन्त्रीलाई १५ करोड र मन्त्रीहरूलाई १४ करोडको गाडी खरिद गर्दा मुलुकको अर्थतन्त्रले कसरी धान्न सक्छ ।’

त्यसपछि प्रधानमन्त्रीले त्यत्रो महँगो गाडी खरिद गर्ने प्रस्ताव नै नआएको बताए । यद्यपि, उनले राष्ट्रपतिको सुरक्षा हुने गरी राम्रो गाडी खरिद गर्न लागिएको जानकारी दिएका हुन ।

उनले राष्ट्रपतिको पदीय मर्यादा र सुरक्षामा ध्यान दिनु सरकार र जनताको कर्तव्य पनि रहेको बताए ।

उनले त्यसअघि विनियोजन विधेयकअन्तर्गत राष्ट्रपति तथा उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय र राष्ट्रिय योजना आयोगको सचिवालयका विविध शीर्षकमा सांसदले उठाएका जिज्ञासाको जवाफ दिएका थिए । उनले आगामी वर्षको बजेट र सरकारका प्राथमिकताका विषयमा प्रस्टसमेत पारेका थिए ।

उनले भूकम्पपछिको पुनर्निर्माणलाई उच्च प्राथमिकता दिएर प्राधिकरणले काम गरिरहेको सुनाउँदै पाँच लाखभन्दा बढी लाभग्राहीको विवरण संकलन भएको, कर छली हुन नदिन सरकार प्रतिबद्ध रहेको, सुशासन प्रवद्र्धन, स्थानीय तहमा बजेट वृद्धि, निर्वाचन क्षेत्र निर्धारण आयोग गठन प्राथमिकतामा रहेको बताए ।

सोमबारै संसद्को दोस्रो बैठकले विनियोजन विधेयक बहुमतले पारित गरेको थियो । अर्थमन्त्री ज्ञानेन्द्रबहादुर कार्कीले प्रस्तुत गरेको उक्त विधेयकलाई बहुमतले पारित भएको घोषणा सभामुख ओनसरी घर्ती मगरले गरेकी थिइन । यो समाचार आजको अन्नपूर्ण पोस्टमा प्रकाशित छ ।