देउवा र ठाकुरबीच भेटवार्ताः समर्थन फिर्ता लिने चेतावनी

काठमाडौं  । राष्ट्रिय जनता पार्टी (राजपा) नेपाल अध्यक्षमण्डलका संयोजक महन्थ ठाकुरले प्रधानमन्त्री शेरबहादुर देउवालाई भेटेर संविधान संशोधन गर्न नसक्ने भए सरकारलाई दिएको समर्थन फिर्ता लिने चेतावनी दिएका छन् ।

मंगलबार अपराह्न सिंहदरबार पुगेका ठाकुरले तीनबुँदे सहमतिबमोजिम संविधान संशोधन हुन्छ कि हुँदैन भनी सोधेका

थिए ।

देउवाले आफू त्यसैका लागि प्रयासरत रहेको जवाफ दिदै केही दिन कुर्न आग्रह गरे पनि ठाकुर असन्तुष्ट हुँदै निस्केको उच्च स्रोतले जनायो ।

अध्यक्षमण्डलका कुनै पनि नेता नलिई सिंहदरबार पुगेका ठाकुरसँग प्रधानमन्त्री देउवाले एक्लै कुरा गरेका थिए । दुई नेताबीच करिब आधा घन्टा कुराकानीपछि ठाकुर भारतीय राजदूत मञ्जिभसिंह पुरीलाई भेट्न लैनचौरस्थित दूतावास गएका थिए ।

पुरीसँग के कुरा भयो भन्नेबारे दुवै पक्षले खुलाउन मानेनन् । यो भेटमा पनि कोही सहयोगी थिएनन् । ठाकुरका यी दुवै भेट अति गोप्य राखिएको छ । प्रधानमन्त्री र राजदूतसित यसअघिका भेटहरुमा राजपा अध्यक्षमण्डलका अन्य नेता पनि सहभागी हुन्थे ।

प्रधानमन्त्री र राजदूत भेट्नुअघि उनले भने आफू देउवा भेट्न गइरहेको जानकारी दिएका थिए । तर, सिंहदरबार र लैनचौर भेटपछि उनी सम्पर्कमा आउन चाहेनन् ।

साँझसम्म चलेको राजपा अध्यक्षमण्डल बैठक बीचैमा छाडेर ठाकुर सिंहदरबार र लैनचौर गएका थिए । त्यसपछि उनी पार्टी बैठकमा आए पनि दिनभरका भेटबारे कुनै कुराकानी नभएको पार्टी उच्च स्रोतले दाबी गर्‍यो ।

दोस्रो चरणको स्थानीय चुनाव निर्वाध सफल भएपछि राजनीतिक निकास निकाल्ने र अगाडिको बाटो पहिल्याउनेबारे महत्वपूर्ण छलफल भएको हुन सक्ने अध्यक्षमण्डलका एक नेताले बताए ।

तर उनले त्यसबारे विस्तृत जानकारी पाइनसकेको दाबी गरे । ठाकुरका एक सहयोगीले प्रधानमन्त्री र राजदूतसँगका दुवै भेटको एकअर्कासँग सम्बन्ध रहेको संकेत गरे पनि विस्तारमा भन्न नसकिने बताए ।

ठाकुर र एमाले अध्यक्ष केपी ओलीबीच पनि मंगलबारै छलफल हुने बताइए पनि भएन । केही दिनअघि सानोठिमी निवासमा  ठाकुरले भने  एमालेका दोस्रो तहका नेताहरुसँग आफ्ना नेताहरुको कुराकानी भइरहेको खुलाएको बताएका छन ।

उनले राजनीतिक समस्या समाधानका लागि सुरुमा एमाले बाधक देखिए पनि पछिल्ला दिनमा सत्ता नेतृत्वकर्ता कांग्रेसले रुचि नदेखाएको भन्दै रोष प्रकट गरेका थिए ।

राजपा अध्यक्षमण्डलका अर्का नेता राजेन्द्र महतोले आफूहरु सबै पक्षसँग गम्भीर छलफल चलाउने मनस्थितिमा पुगेको बताए ।

मंगलबार कान्तिपुरसँग कुरा गर्दै महतोले भने–‘राजनीतिक अवरोध धेरै लम्ब्याउन हुँदैन भनेरै हामी वार्ताहरुमा लचकतासाथ प्रस्तुत भएका हौं, अझै पनि एमालेसहित सबै पार्टीसँग खुला संवाद गर्न तयार छौं ।’

उनले त्यसका लागि पार्टीभित्र कुराकानी चलिरहेको रहेको समेत बताएका छन । यो समाचार आजको कान्तिपूर दैनिकमा प्रकाशित छ ।