मकवानपुरका तीन पत्रकार जनप्रतिनिधि

हेटौँडा । स्थानीय तह निर्वाचनमा मकवानपुरका तीनजना पत्रकार जनप्रतिनिधि बनेका छन् । मकवानपुरका प्रमुख तीन दलबाट छ पत्रकार चुनावी मैदानमा उत्रिएका थिए ।

पत्रकार सवीन न्यौपाने हेटौँडा–१ का वडाध्यक्ष, नवीन सिग्देल हेटौँडा वडा नं ४ का वडाध्यक्ष र देवराज रिमाल हेटौँडा–७ का वडा सदस्यमा निर्वाचित भएका छन ।

निर्वाचनमा होमिएका नेपाली काँग्रेसबाट एक, नेकपा (एमालें)का तर्फबाट तीन र नेकपा (माओवादी केन्द्र)बाट एकमध्ये एमालेका कुमार नेगी थाहा–३ को वडाध्यक्षमा, धु्रवराज ढकाल र सन्तोष न्यौपाने हेटौँडा–१० को वडाध्यक्षमा पराजित भएका हुन् ।

युवा पुस्ताका पत्रकार सवीन न्यौपाने प्रेस युनियन मकवानपुरका उपाध्यक्ष र रिपोर्टर्स क्लब मकवानपुरका अध्यक्ष समेत रहेका छन् ।

उनको जिल्लामा रहेका विभिन्न सङ्घसंस्थामा सक्रिय भएको हुनाले काँग्रेस हेटौँडा १ नं एकाइ समितिले सर्वसम्मत उम्मेदवारका रुपमा पार्टीले सिफारिस गरेको थियो । उनी साझा कुरा राष्ट्रिय दैनिकका प्रकाशक र सम्पादकसमेत रहेका छन ।

सिग्देल हेटौँडा टुडेका सम्पादक र रिमाल ‘थाहा सन्देश’मा आबद्धका साथै प्रेस चौतारीका पूर्व केन्द्रीय उपाध्यक्ष हुन। रासस