रुससँग कुनै सम्बन्ध छैन, मलाई काम गर्न देऊः राष्ट्रपति ट्रम्प

‘मलरलाई विशेष अनुसन्धानकर्तामा नियुक्त गर्ने निर्णयको स्वागत’

अमेरिका । पछिल्लो अवस्थामा चुनावी अभियान र रुसबीच साँठगाँठको बिवादमा अमेरिकी राष्ट्रपति डोनाल्ड ट्रम्प तानिएका छन । उक्त सम्बन्धको विषयमा तिब्र आरोप खेपिरहेका राष्ट्रपति ट्रम्पले आफूले सहज ढङ्गले शासन चलाउन चाहेको बताउदैँ काम गर्न दिनुपर्ने बताएका छन ।

वासिङटनमा एउटा पत्रकार सम्मेलनमा बोल्दै उनले उक्त आरोपको जाँच गर्न विशेष अनुसन्धानकर्ता नियुक्त गर्ने निर्णयलाई आफूले स्वागत गर्नेपनि भएपनि त्यो विषयले देशलाई विभाजित बनाइरहेको भन्दै त्यस्तो बताएका हुन । उनले रुससँग आफ्नो कुनै सम्बन्ध नरहेको समेत दोहोर्याएका छन्।

ट्रम्पले अमेरिकी संघीय जाँच ब्युरो एफबीआइले रुसमाथि गरिरहेको छानविन प्रभावित पार्न त्यसका निर्देशक जेम्स कोमीलाई बर्खास्त गरेको भन्ने आरोप पनि अस्वीकार गरेका छन। उनले कोमीलाई एकदमै अलोकप्रिय व्यक्तिका रुपमा व्यख्या गरे ।

त्यसअघि एक जना वरिष्ठ डेमोक्र्याट नेतृले यदि ट्रम्पसँग लुकाउनुपर्ने कुनै विषय नरहेको भए उनले रुसले हस्तक्षेप गरेको भन्ने दाबीमाथि पूर्ण स्वतन्त्र छानविन गराउन दिनुपर्ने धारणा राखेकी थिइन्।

अमेरिकी तल्लो सदनकी डेमोक्र्याट नेतृ न्यान्सी पेलोसीले त्यस्तो अनुसन्धानले मात्र केही लुकाइएको भन्ने आशंकाहरु पूर्ण रुपमा समाप्त पार्ने बताएकी छन । उनले हाल नियुक्त गरिएका विशेष अभियोजक पूर्व एफबीआइ प्रमुख रोबर्ट मलर अझै पनि अमेरिकी न्याय मन्त्रालयकै सुपरीवेक्षणमा हुने बताइन। मलर सन् २००१ देखि २०१३ सम्म एफबीआइका प्रमुख थिए।

यसअघि उपमहान्यायाधिवक्ता रड रोजेन्सटाइनले अनुसन्धानबारे सांसदहरुलाई जानकारी गराएका थिए। त्यसपछि एक जना डेमोक्र्याट सिनेटर रिचर्ड ब्लुमेन्थोलले विशेष अभियोजकले फौजदारी छानविन अघि बढाउन लागिरहेको बताएका थिए। (अन्तर्राट्रिय पत्रपत्रीकाहरुबाट)