मेसेडोनियाको संसद भवनभित्रै झडप, १० जना घाइते

आफूलाई राष्ट्रवादी बताउनेहरुले प्रदर्शन गरेको दावी

मेसेडोनिया । एक जना अल्बेनियाली जातीय नेता संसदको सभामुखमा निर्वाचित भएपछि मेसेडोनियाको संसदमा भिडन्त भएको छ । भिडन्तबाट समाजवादी प्रजातान्त्रिक पार्टीका नेता सहित १० जनाभन्दा बढि घाइते भएका छन ।

सामाजिक सञ्जालमा सत्तारुढ समाजवादी प्रजातान्त्रिक पार्टीका नेता जोरान जायफको अनुहारबाट रगत झरिरहेको तस्वीरहरु राखिएका छन्।

प्रदर्शनकारीहरु पूर्व प्रधानमन्त्री निकोला ग्रुएभस्कीको भिएमआरओ पार्टीका समर्थकहरु थिए जसले नयाँ चुनावको माग गरिरहेका छन्।

उक्त पूर्व युगोस्लाभ गणतन्त्रमा गएको डिसेम्बरमा भएको आमचुनावको परिणाम अनिर्णित भएपछि राजनीतिक गतिरोध कायम रहेको छ । तर दुई वर्षअघिको फोन ट्यापिङ विवाद पनि निरन्तर कायम नै रहेको छ ।

समाजवादी नेता जायफले अल्बेनियाली जातीय पार्टीसँग मिलेर गठबन्धन बनाएका छन् तर सरकार बनाउने उनको प्रयासलाई देशका राष्ट्रपतिले रोकिदिएका थिए त्सपछि गठबन्धन बनाउने प्रयास भए यता नै मेसेडोनियाका आफूलाई राष्ट्रवादी बताउनेहरुले प्रदर्शन गरिरहेका छन् । त्यहाँको जनसंख्याको एक चौथाइ जातीय अल्बेनियालीहरु छन् ।

गठबन्धनले तालर जाफेरीलाई सभामुख बनाउने निर्णय गरेपछि आक्रोशित व्यक्तिहरुको समूह संसद भवनमा प्रवेश गरेको थियो ।

झण्डै २ सय जना प्रदर्शनकारीले अनुहार ढाक्ने मास्क लगाएका थिए र प्रत्यक्षदर्शीहरुले फुटेका सिसा भुईँमा देखेको र हलभित्र रगतका दागहरु पनि देखिएको उल्लेख गरेका छन् ।