विमानस्थलमा टर्किस महिलाको ‘ब्रा’ र ‘पेन्टी’मा चरेस भेटियो

काठमाडौं । पर्यटक भिसामा नेपाल आएकी टर्किस नागरिक सुयस सेलेन स्वदेश फर्कन विमानस्थलमा पुगिन् । सोमबार दिउँसो ३ बजे प्रस्थान कक्षमा पुगकी उनको साथमा सानो झोला मात्रै थियो ।

प्रहरीले झोला जाँच गर्दा झोला पास भयो । शरीरमा रहेका फलामे बस्तु सबै निकालेर उनले एक्सरे वाकथ्रु गेट पार गरेपछि जाँचमा रहेका प्रहरीलाई शंका लागेको हो ।

उनको संवेदनशिल अंगमा शंस्कास्पद सामान देखिएको थियो । जाँचमा रहेका प्रहरीले उनलाई केही बोक्नुभएको छ भने निकाल्नुहोस् है भने ।

उनले हाँसेर केही छैन भनेपनि जाँचकीको शंका हटेन । अवस्था शंस्कास्पद निस्किएपछि महिला प्रहरीले नजिकै रहेको शरीर जाँच गर्ने स्थानमा लगिन् ।

प्रहरीले उनको भित्री पहिरन ब्रा र पेन्टीभित्र चरेस फेला पारेको थियो । जसको तौल निस्कियो ३ सय २ ग्राम ।

उनीसँगको सोधपुछपछि सुयसले अर्का युवकको नाम पनि लिइन्, एग्रुनी केमाल । ती युवक पनि टर्की जान विमानस्थलमै रहेको सूचना आएपछि प्रहरी उनको खोजीमा जुट्यो ।

उनी प्रहरीको जाँच कटेर अन्तिम गन्तव्य कक्षमा विमान चढ्न थालिसकेका थिए । यो समाचार आजको नागरिक न्यूजमा प्रकाशित छ ।