गृहमन्त्री निधि क्याबिनेट बैठकमै नजाने

काठमाडौं । कमल थापालाई दोस्रो वरीयतामा राख्ने प्रधानमन्त्री पुष्पकमल दाहालको निर्णयप्रति असन्तुष्ट उपप्रधान एवं गृहमन्त्री विमलेन्द्र निधिले मन्त्रिपरिषद् बैठकमा सहभागिता नजनाउने बताएका छन ।

प्रधानमन्त्रीपछिको वरीयता आफूले नपाए पद छाड्ने सार्वजनिक अभिव्यक्ति दिएका निधिलाई पार्टी सभापति शेरबहादुर देउवाले पद नछाड्न सुझाव दिएपछि ‘पद नछाड्ने तर मन्त्रिपरिषद् बैठकमा सहभागी नहुनेु रणनीति अपनाउन लागेका हुन ।

‘गृहमन्त्रीज्यू अबदेखि मन्त्रिपरिषद् बैठकमा जानुहुन्नु, निधि निकट स्रोतले भन्यो–‘उहाँले आफूसम्बद्ध मन्त्रालयका एजेन्डा प्रधानमन्त्रीसँग छुट्टै छलफल गर्नुहुन्छ र प्रधानमन्त्रीमार्फत पठाउनुहुन्छ ।ु थापालाई मन्त्रिपरिषद्मा दोस्रो वरीयता दिने प्रधानमन्त्रीको कदम स्वीकार नगर्ने निर्णयमा पुग्नुभएका निधिले थापा सहभागी हुने मन्त्रिपरिषद् बैठकमा भाग नलिन यस्तो योजना बनाएको स्रोतले बतायो ।’

निधिले आवश्यक परेको बेला मन्त्रीहरूसँग छलफल, समन्वय गरी आफ्ना एजेन्डा राख्ने तर मन्त्रिपरिषद् बैठकमा भने सहभागी नहुने अडान लिइसकेको कांग्रेसका ती मन्त्रीले जानकारी दिए ।

उपप्रधानमन्त्री विमलेन्द्र निधिले भने–‘म मन्त्रिपरिषद् बैठकमा जान्नँ । बैठक बस्नुअघि प्रधानमन्त्रीसँग छुट्टै छलफल गरी आफ्ना एजेन्डा मन्त्रिपरिषद्मा पठाउँछु । प्रधानमन्त्रीले गरेको वरीयताको निर्णय स्वीकार गर्न सक्दिनँ ।’

स्थानीय तह निर्वाचनको तयारी, सुरक्षालगायतका विषयमा कुराकानी गर्नुपर्ने बेला गृहमन्त्री नै मन्त्रिपरिषद्मा अनुपस्थित हुने निर्णयले सरकारलाई एकीकृत धारणा बनाउन गाह्रो पर्ने कांग्रेसका ती मन्त्रीले बताए । ‘निर्वाचनका बेला मन्त्रीहरूबीचको यस्तो कामले सरकारलाई गाह्रो परिहाल्छ,’–कांग्रेसका अर्का मन्त्रीले भने ।

गृहमन्त्री निधिका प्रेस सल्लाहकार रामजी दाहालले पार्टी सभापति देउवाको निर्देशनपछि निधिले पदबाट राजीनामा नदिने निर्णय गरेको बताए ।

उपप्रधानमन्त्रीबीचको वरीयता विवाद, नेपाल प्रहरीको आईजीपी नियुक्तिको विवाद र मधेसी मोर्चालाई मनाउन प्रस्तावित संविधान संशोधनको प्रस्तावमा सहमति जुट्न नसक्दा मन्त्रिपरिषद् बैठक सोमवारका लागि सारिएको छ ।

मधेसी मोर्चाले स्थानीय तह निर्वाचनमा आउने लिखित प्रतिबद्धता जनाएपछि मात्र संशोधन प्रस्ताव संसद्मा लैजानुपर्ने सुझाव केही मन्त्रीले दिएका कारण पनि मन्त्रिपरिषद् बैठक एक दिन पर सारिएको प्रधानमन्त्री दाहाल निकट स्रोतले जानकारी दिएको छ । यो समाचार आजको अन्नपूर्ण पोष्ट दैनिकमा प्रकाशित छ ।