चैत ३ गतेबाट माध्यमिक शिक्षा परीक्षा सुचारु

काठमाडौं। यस वर्षको कक्षा १० को माध्यमिक शिक्षा परीक्षा (एसएलसी) चैत ३ गते देखि शुरू हुँदैछ । परीक्षाका लागि आवश्यक सबै तयारी पूरा भएको जानकारी परीक्षा नियन्त्रण कार्यालयले दिएको छ ।

यसअघि एसएलसीका रूपमा लिइँदै आएको परीक्षा यस वर्षदेखि माध्यमिक परीक्षाका रूपमा सञ्चालन हुन लागेको हो । परीक्षा तालिकाअनुसार चैत ३ गते पहिलो दिन अनिवार्य अङ्ग्रेजी विषयको परीक्षा परेको छ । प्राविधिकसमेत गरी उक्त माध्यमिक शिक्षा परीक्षा आगामी चैत १४ गते सकिने छ । परीक्षा नियन्त्रक अम्बिका रेग्मीले परीक्षाका लागि आवश्यक प्रश्नपत्र, उत्तरपुस्तिका लगायत सबै सामग्री सम्बन्धित जिल्लामा पु¥याइसकिएको जानकारी दिए।

परीक्षामा पाँच लाख ३८ हजार १८२ जना परीक्षार्थी सहभागी हुनेछन् । परीक्षामा दुई लाख ७८ हजार ४५० जना छात्रा र दुई लाख ५९ हजार ७३२ जना छात्र सहभागी हुने जानकारी कार्यालयले दिएको छ ।

कक्षा १० को परीक्षाका लागि एक हजार ९२३ परीक्षा केन्द्र बनाइएको छ । हरेक परीक्षा केन्द्रका लागि एक जना केन्द्राध्यक्ष, दुई हजार ६४६ जना सहायक केन्द्राध्यक्ष र २२ हजार ४६१ जना निरीक्षक परिचालन गरिएको छ । गत वर्षको तुलनामा यसपटक परीक्षा केन्द्र घटाइएको छ ।

विभिन्न जिल्लाका परीक्षा केन्द्रमा परीक्षालाई मर्यादित हिसाबले सञ्चालन गरेको भन्दै परीक्षा नियन्त्रण कार्यालयले केही परीक्षा केन्द्रलाई कारबाही गरेका कारण परीक्षा कम भएको परीक्षा नियन्त्रक रेग्मीले जानकारी दिए ।

त्यतै शिक्षा मन्त्रालयले सबै प्रदेश समेटिने गरी सहसचिवको नेतृत्वमा १८ वटा अनुगमन टोली परिचालन गर्ने भएको छ । क्षेत्रीय शिक्षा निर्देशनालय, जिल्लामा रहेको माध्यमिक शिक्षा उत्तीर्ण परीक्षा समन्वय समितिका पदाधिकारी र जिल्ला शिक्षा कार्यालयका कर्मचारीको अनुगमन टोलीले समेत अनुगमन गर्ने व्यवस्था मिलाइएको छ ।

परीक्षा नियन्त्रक रेग्मीका अनुसार अक्षराङ्कन पद्धतिका आधारमा परीक्षाको नतिजा प्रकाशन गर्ने व्यवस्था मिलाइएको छ भने २०७२ सालको परीक्षाको नतिजामा कुनै विषयमा ‘डी’ वा ‘ई’ ग्रेड प्राप्त भएकोमा उक्त विषयमध्ये परीक्षार्थीले चाहेको विषयमा मात्र परीक्षा दिने व्यवस्था मिलाइएको छ ।

साथै एकभन्दा बढी विद्यालय या जिल्लाबाट विद्यार्थीले परीक्षा रजिस्ट्रेसन फाराम भरेको पाइएमा त्यस्ता परीक्षार्थीको परीक्षा रद्द गरिने जानकारी नियन्त्रक रेग्मीले दिए । शिक्षा मन्त्रालयले परीक्षालाई मर्यादित रूपमा सम्पन्न गर्न सबै पक्षसँग आग्रह गर्दै परीक्षामा कुनै अनुचित काम भए कडा कारबाही गर्ने चेतावनी दिएको छ ।

परीक्षाको मर्यादा भङ्ग हुने कुनै कार्य गरेमा गर्न लगाएमा वा सो कार्य गर्न सहयोग पु¥याएमा पनि एक लाख रुपियाँ जरिवाना गरिने जनाइएको छ ।

परीक्षालाई मर्यादित हिसाबले सञ्चालन गर्नेबारे सोमबार शिक्षामन्त्री धनीराम पौडेलसमेतको उपस्थितिमा सुरक्षा निकायका उच्च पदाधिकारीको बैठकसमेत मन्त्रालयमा बसेको थियो । बैठकमा विद्यार्थीको मनोविज्ञानमा असर नपर्ने गरी परीक्षा अवधिभर प्रभावकारी अनुमगन गर्ने निर्णय भएको जानकारी दिइएको छ । गोरखा पत्र