संविधान कार्यान्वयन गर्न निर्वाचन अपरिहार्य – देउवा

चुनावको तयारीमा लाग्न कार्यकर्तालाई निर्देशन

काठमाडौँ, माघ २१ । नेपाली काँग्रेसका शीर्षनेताहरुले संविधान कार्यान्वयन गर्न निर्वाचन अपरिहार्य भएको हुँदा स्थानीय निकायको निर्वाचनमा जुट्न आफ्ना कार्यकर्तालाई निर्देशन दिएका छन ।

उनीहरुले एकै स्वरमा भने – “तत्कालीन पार्टी सभापति सुशील कोइरालाको कुशल नेतृत्वमा जारी भएको संविधान कार्यान्वयन गर्ने प्रमुख जिम्मेवारी नेकाको नै हो, निर्वाचनबाट नै संविधान कार्यान्वयनको सुरुवात हुन्छ ।”

नेकाको भ्रातृ सङ्गठन नेपाल ट्रेड युनियन काँग्रेसको दुई दिने राष्ट्रिय परिषद् बैठकलाई आज सम्बोधन गर्ने क्रममा शीर्षनेताहरुले जनताले दोस्रो संविधानसभाको निर्वाचनमा मत दिए जस्तै स्थानीय निर्वाचनमा पनि नेकालाई मत दिने विश्वास समेत व्यक्त गरे ।

उनीहरुले व्यवस्थापिका–संसद्बाट स्थानीय निर्वाचनका लागि आवश्यक विधेयक पारित भइसकेको र निर्वाचन आयोगले पूर्णता पाएको सन्दर्भमा स्थानीय निर्वाचनको मिति जुनसुकै समयमा घोषणा हुनसक्ने बताए ।

नेकाका सभापति एवम् पूर्वप्रधानमन्त्री शेरबहादुर देउवाले संविधान कार्यान्वयनका लागि निर्वाचनमा जानुको विकल्प नरहेको बरु, एक वर्षभित्र तीनवटा निर्वाचन सम्पन्न गर्नुपर्ने चुनौती रहेको बताए ।

“निर्वाचनमा जान काँग्रेस अवस्थामा छ, संविधान कार्यान्वयनका लागि काँग्रेस जुनसुकै मूल्य चुकाउन तयार छ,” उहाँले भने ।

स्थानीय निकायको निर्वाचनमा जित्ने व्यक्तिलाई मात्र टिकट दिइने पनि उहाँले खुलासा गरे । श्रम आयोग श्रम ऐन संशोधन गरी पनि गठन गर्न सकिने उनको भनाइ थियो ।

वरिष्ठ नेता रामचन्द्र पौडेलले संविधान सबै राजनीतिक दलको सम्झौताबाट आएको हुँदा मजदुरले उठान गरेका सबै माग समेट्न नसकिएको स्पष्ट पार्दै श्रम ऐन संशोधनबाट श्रमिकका माग पूरा गर्न सकिने बताए।

“उद्योग स्थापना नभई मजदुरले काम पाउँदैनन्, मजदुर नभई उद्योग पनि चल्न सक्दैनन्, यस्तो अवस्थामा उद्योग र मजदुरका आपसी समन्वयबाट मात्र श्रमिक हक स्थापित हुन्छ,” उनले भने ।

महामन्त्री डा शशाङ्क कोइरालाले संविधान कार्यान्वयन गर्न एक वर्षभित्रमा तीनवटा निर्वाचन सम्पन्न गर्नुपर्ने जिम्मेवारीलाई पूरा गर्न नेका तयार रहेको बताए ।

उहाँले तत्कालीन पार्टी सभापति विश्वेश्वरप्रसाद कोइराला र गिरिजाप्रसाद कोइरालाको समयमा पूर्वाधार विकासले तीव्रता पाई देशले कोल्टे फेरेको चर्चा गरे।

कोषाध्यक्ष सीतादेवी यादवले सरकारले स्थानीय निकायको निर्वाचनको मिति घोषणा गर्न आन्तरिक तयारी गरिरहेको हुँदा निर्वाचनमा तयारी जुट्न आग्रह गरे।

नेपाल ट्रेड युनियन काँग्रेसका अध्यक्ष खिलानाथ दाहालले दुईदिने बैठकमा श्रमिकका हकअधिकारका बारेमा छलफल हुने जानकारी दीए । रासस