खजुराको कोरोना बिशेष आइसोलेसन अस्पताल बन्द

क्यान्सर अस्पतालबाट कोरोनाका बिरामीलाई दिइने सेवा भेरी अस्पतालबाट दिइने ः अध्यक्ष के.सी

बाँके ।  बाँकेको खजुरामा रहेको सुशिल कोईराला प्रखर क्यान्सर अस्पतालमा रहेको कोरोना बिशेष आईसोलेसन अस्पताल शनिवार देखि बन्द भएको छ ।

क्यान्सरका बिरामीलाई उपचार गर्ने उद्देश्यले आईसोलेसन सेन्टर बन्द गरिएको हो ।

प्रदेश ५ सरकारले क्यान्सर अस्पताल खजुरालाई गत बैशाख महिना देखि कोरोना बिशेष आईसोलेसन अस्पतालका रुपमा स्थापना गरेको थियो ।

बाँकेमा सुबिधा सम्पन्न आईसोलेसन अस्पतालका रुपमा २ बेड भ्यान्टिलेटर, ६ बेड आईसियु सहित ५० बेडको कोरोना बिशेष आईसोलेसन अस्पताल बन्द भएसंगै त्यहाँबाट पाउने सेवा नेपालगन्जको भेरी अस्पतालमा दिईने भएको छ ।

सुशिल कोईराला प्रखर क्यान्सर अस्पताल ब्यबस्थापन समितिका अध्यक्ष भक्त बहादुर के.सीले हाल सम्म क्यान्सर अस्पतालबाट कोरोना बिशेष आईसोलेन सेन्टरका रुपमा दिईने सेवा सुबिधा अब देखि भेरी अस्पतालले दिने बताए ।

अध्यक्ष के.सी.का अनुसार कोभिड १९ को जोखिम भएकै बेला क्यान्सरका बिरामीलाई पनि सेवा दिनु पर्ने भएकाले कोरोना अस्पतालको बिकल्प तयार भएपछि मात्र बन्द गरिएको जानकारी दिए ।

सुशिल कोईराला प्रखर क्यान्सर अस्पताल खजुराका डा. प्रबिण गुप्ताले बैशाख १९ गते बाँकेका पहिलो कोरोना संक्रमित ६० बर्षिय पुरुषलाई आईसोलेसन सेन्टरमा राखेर दिईएको सेवा हाल सम्म १ सय ९७ जना कोरोना पोजेटिभको सफल उपचार भएर सबै जनालाई घर पठाईएको समाचारदातासंगको फोन बार्ताको क्रममा बताए

डा. गुप्ताले शनिवार अन्तिम लटमा २२ जना ब्यक्तिहरु कोरोना जितेर घर फर्किएसंगै आगामी दिनमा क्यान्सरको उपचार गर्नेगरि कोरोना बिशेष अस्पतालको सेवा बन्द गरिएको जनाए ।

प्रदेश ५ सरकारका भौतिक पूर्वाधार मन्त्री बैजनाथ चौधरीको संयोजकत्वमा कोरोना बिशेष अस्पताल सञ्चालनमा थियो ।

डा. प्रकाश थापाको संयोजकत्वमा बिज्ञ तथा प्राबिधिक टिम, खजुरा गाउँपालिका अध्यक्ष किस्मत कुमार कक्षपतिको संयोजकत्वमा आवास भोजन तथा यातायात लगायतका उप समितिहरु समेत सहभागी भई सफल कोरोना बिशेष अस्पतालका रुपमा ब्यबस्थापन गरिएको थियो ।