जापानमा हुने विश्व खेलकुद ओलम्पिक अन्योलमा

नेपालका १५ खेलाडी सिफारिस

जापान । विश्वब्यापी रुपमा फैलिएको कोरोना भाइरसको त्रासका कारण जापानको टोकियोमा जुलाई २४ देखि अगस्ट ९ तारिखसम्म आयोजना हुने विश्व खेलकुदको महाकुम्भ ओलम्पिक पनि अन्योलमा परेको छ।

जापानले भने समयमै ओलम्पिक आयोजना गर्ने दाबी गरेको छ। जापानका प्रधानमन्त्री सिन्जो आबेले समयमै ओलम्पिक गर्न जापान तयार रहेको बताएका छन्। ‘कोरोना भाइरसका कारण ओलम्पिक सारिनु पर्ने कारण छैन। कोरोनाको संक्रमणबाट जोगिने विषयमा हामी सचेत छौं,’ आबेले भनेका छन्।

आबेले ओलम्पिक खेलकुदको अन्तिम टुंगो भने अन्तर्राष्ट्रिय ओलम्पिक कमिटी (आईओसी) ले लगाउने पनि बताए। कोरोना भाइरसको कारण हाल विश्वभर खेलकुद प्रतियोगिता प्रभावित भएको छ।

अन्तर्राष्ट्रिय ठूला खेलकुद प्रतियोगिताहरू धमाधम रोकिएका छन्। ओलम्पिक आयोजनाका लागि जापानले ठूलो धनराशि खर्च गरिसकेको र तयारी झन्डै अन्तिम चरणमा पुगेकाले प्रधानमन्त्री आबेको यस्तो धारणा आएको हो।

जापानले ओलम्पिकका लागि १.३५ ट्रिलियन जापानी येन खर्च गरिसकेको छ। टोकियो ओलम्पिक समयमै आयोजना गर्ने कि नगर्ने भन्ने विषयमा आईओसीले भने निर्णय गरिसकेको छैन।

जापानी प्रधानमन्त्रीले ओलम्पिक हुने दाबी गरिरहँदा आईओसीका सदस्य डिक पाउन्डले भने यही अवस्थामा ओलम्पिक हुन नसक्ने बताएका छन्। उनले स्वास्थलाई ख्यालगरी आईओसी यसमा सचेत हुनुपर्ने पनि बताए।

ओलम्पिकलाई लक्षित गरी गरिएको तयारीलाई कतिपय देशले भने स्थगित गरिसकेका छन्। यसअघि ग्रिसबाट मार्च १३ गते सुरु गर्न लागिएको ओलम्पिक टर्च र्याली कोरोनाकै कारण स्थगित गरिएको थियो। जापानले ओलम्पिक टर्च र्यालीको कार्यक्रमसमेत मार्च २६ का लागि तय गरेको छ।

टोकियोका गभर्नर युरिको कोइकेले टर्च र्याली जापानभित्रै गरिने बताए। अमेरिकाले ओलम्पिक खेलको तयारी यसअघि नै रोकिसकेको छ। टोकियो ओलम्पिकमा ३३ वटा खेल समावेश गर्ने निर्णय भइसकेको छ। जसका लागि दुई सय ६ देशका ११ हजार ९१ खेलाडीको सहभागिता रहने बताइएको छ।

नेपालका १५ खेलाडी सिफारिस

नेपाल ओलम्पिक कमिटी ९एनओसी० ले टोकियो ओलम्पिकमा नेपालबाट नौ खेलमा १५ जना खेलाडीलाई वाइल्ड कार्डका लागि प्रस्ताव गरेको छ। वाइल्ड कार्डमार्फत दुई खेलमा तीन जना खेलाडीको सहभागिता भने पक्का भइसकेको छ। यसपटक पौडीमा दुई जना र एथलेटिक्समा एक जनाको सहभागिता पक्का भएको हो।

पौडीको महिलामा गौरिका सिंह र पुरुषमा एलेक्स शाहले प्रतिस्पर्धा गर्नेछन्। एथलेटिक्समा यसपटक म्याराथनमा सहभागिता जनाउने एनओसीको तयारी छ। त्यसबाहेक वाइल्ड कार्डका लागि आईओसीमा कराँते, आर्चरी, तेक्वान्दो, सुटिङ, भारोत्तोलन, पौडी र जुडोका १२ जना खेलाडीको नाम पठाइएको एनओसीले जनाएको छ।

ओलम्पिक छनोटका लागि नेपालका दुई जना बक्सिङ खेलाडीले हालै जोर्डनमा भएको एसिया/ओसियाना क्षेत्रको छनोट खेलमा भाग लिएका थिए। पुरुष ६३ केजीमा सनिल शाही र महिला ५७ केजीमा मीनु गुरुङले भाग लिए पनि छनोट हुन सकेनन्। यी दुवै खेलाडी १३औं दक्षिण एसियाली खेलकुद सागका स्वर्ण विजेता हुन्।

(यो समाचार आजको अन्नपूर्णपोष्टमा प्रकाशित छ ।)